مرايا بيروت

عزيزي الرئيس... 

بدنا عونك!

بقلم حنين غنام

بعرف اتأخرت كتير لاكتبلك بس بصراحة كنت معتبرة حالي برات هاللعبة... بس اليوم لاحظت في حركة أمنية مهضومة وأعلام متلية الدني فاتذكرت انو عيد الاستقلال قرب... يا حرام... هو شخص واحد بهالبلد ما قادر يستقل عن أهلو بدك بلد مليانة أشخاص متلو تستقل؟

معا حق فيروز... نحن شعب عنيد... لدرجة انو ما بدنا نصدق انو بلدنا مش بلد... وانو تمسحنا عالغلط والفساد...

خليني خبرك شوي عن هالشعب يلي فجأة كلو صار عندو "أصدقاء" تعلقلك صور وشعارات...

منفيق عالشوب أو عالبرد أو عالبرغش قبل المنبه لأنو أكيد ما في كهربا... مندور السيشوار بيتِك الموتور وآخر الشهر مندفع ربع معاشنا للجابي... مش مهم... مننطلق عالشغل بسيارة النا سنين عم نقسّطا قبل ب 3 ساعات من الدوام... هيدا اذا ما كنا عاطلين عن العمل أصلًا... وهون مصيرنا بيصير معلق بالسيارة يلي قدامنا... وما منوصل عالوظيفة الا ما تكون طلعت روحنا عند ربنا... انو ما بيلبقلنا النقل العام أو شو؟ ما بيسوا يرجع ترامواي بيروت... أو نحمل كتاب ونتثقف شوي قبل ما نوصل عالوظيفة...

الحمدالله في شغل... بتعرف كم تلميذ وتلميذة عم يشتغلو ليقدرو يتعلمو... وكم بي وام انكسر رصيدن ليعلمو ولادن... بتعرف كم ساعة بتمرق لتصدق شهادتك بس... وكم مكتب بتزور وكم مرة بتقطع الطريق لتصور ورقة... وبالآخر بتلاقي هالموظف ما الو جلدك عم يعد كم سيجارة صار شربان اليوم... وبكرا منصير نحن نعد كم شهادة صار في على حيط يأسنا...

هيدا غير الزبالة يلي صارت جزء من حياتنا... في أخطر من شعب تعوّد عالزبالة؟؟؟ تعود على أبشع منظر وأبشع ريحة...

طيب والمرأة شو وضعا بقاموسك؟ ما تقلي المرأة اللبنانية حرة وما بدا دعمك...

ما في حرية بظل هالقوانين... بظل العنف والفساد والرشوة... بظل العمى والصم المفتعل...

بدنا استقلال حقيقي... استقلال عن العنصرية والطائفية بدنا وطن أرضو خصبة وبتساع أحلامنا البسيطة...

بدنا كرامة لنقدر نكمل غنية فيروز...

لبنان الكرامة والشعب العنيد...